By വി എം ലീലാഭായ്, പിലാത്തറ യൂണിറ്റ്
ആസുരതാണ്ഡവമാടുന്ന കോവിഡിൻ
ഭീതിയിലാണിന്നു ലോകം
കണ്ണാലെ കാണുവാൻ വയ്യാത്ത മാരക
രോഗാണു പടരുന്നു ശീഘ്രം.
ദുരിതങ്ങൾ വാരി വിതയ്ക്കും മഹാമാരി
സർവനാശത്തിന്റെ നാന്ദിയാണോ?
പണവും പ്രതാപവും ഭീകരൻ തൻ മുന്നിൽ
തൃണമായ് ഭവിക്കുകയല്ലേ?
പ്രാണരക്ഷയ്ക്കായി കേഴുകയാണിന്ന്
ഭൂലോകവാസികളെല്ലാം
ഈ കൊച്ചു വൈറസ് ലോകഗതികളെ
ആകെയും താറുമാറാക്കി.
വീട്ടുതടങ്കലിൽ തെല്ലൊരാശ്വാസത്തിൽ
ദിവസങ്ങളെണ്ണിക്കഴിക്കാം
രോഗത്തിൻ വ്യാപനം തടയുവാൻ രാപ്പകൽ
ധീരരായ് സേവനം ചെയ്യും
മാനവസ്നേഹത്തിൻ മൂർത്തിമദ്ഭാവമാം
സോദരിമാർക്കും സഹോദരർക്കും
നല്ലൊരു നാളെ തൻ പാദസ്വനത്തിനായ്
കാതോർത്തു കൈകോർത്ത് നീങ്ങാൻ
ശക്തി പകരട്ടെ ദൈവം
എന്നും ശക്തി പകരട്ടെ ദൈവം.