T.N Adithya Varma
കവിതേ യൊഴുകം സരിതേ നീയെ-
ന്നരികേ രാഗം മൂളാമോ
കളകള നാദം പൊഴിയും നീയെ-
ന്നകതാരിൽ തേൻ ചൊരിയാമോ
കാതിനു കരളിനു കുതുകം തരുമാ
റിന്നൊരു പല്ലവി പാടാമോ
അർത്ഥം വേണ്ടതു കിട്ടാനായൊരു
നൃത്തം തന്നെ നടിക്കാമോ
നുരയും പതയും വിരിയും പുഞ്ചിരി
ചൊരിയാനായി ത്തുനിയാമോ
ഒഴുകും നിന്നിലിറങ്ങും മാനസ-
മലിനതയെല്ലാം മാറ്റാമോ
വേദന തിങ്ങും മാനവ ഹൃത്തിനു
മോദമൊരിത്തിരി നൽകാമോ